دوار الخمار (1)

خش برجلك اليمييين

العوافي عليكوا دي بقي صفحه  إنما ايه بقي يا معلمين  حاجه في الخمسينه بيكتبها الخمار ومحدش يسأل جت منين الخمار دي  مش كل جرنان، نكتب فيه كلمتين يقعدوا يسألوا هو أسمك من الخمره يعني بتاع بوظه  وللا بتبيع  خمارات من بتاعة الستات المحجبات؟ مفهوم يا قراء محدش يعترض بكل حرية ؟ خشوا بقي ع الصفحة وسمعونا زغروته بالصلاة ع النبي عاوزين ناكل عيش من سكوووت؟

……………

اضحك يارخم

 واحد مسطول قاعد يفكر مع نفسه ويقول "جمبرى فى الطبق؟ لا ارنب فى الجردل؟ استكوزا فى البانيو؟ يوووه برضه مش دى، انا هتصل اعرف من الدكتور احسن." راح اتصل بيه وساله "يا دكتور انا عندى ايه؟" قال له "انا قولت لك ميت مره انت عندك سرطان فى الحوض.

……………….

سلام مربع

كل واحد يفتي فيها              ابصر خليك ف الصف ورا

حسبة فيها لخفيها             خلت الدين حسبة محيره

ياعم روح اخترع لك              حاجة تنفع

عند ربك بيها تشفع              نحل بيها مسألة

..................................................

صلوحه ونستون في المحطه

دي حكاية مطرب هفأ من بتوع اليومين دول أي تشابه مع بعض المطربيين من اللي موجودين ملناش دعوة كل واحد حر ، وبعدين اللي خايف ميغنيش ، وسمعونا الفاتحة بالصلاة ع النبي .

في محطة مصر وقف صلوحه ونستون وفرقته الذهبيه منتظرين القطار اللي بيطلع الساعه تسعه وتلت من القاهرة

زحمه في رصيف المحطه زي سوق الجمعه  واحد  من  بوفيه بيجعر بصوت جهوري فين الباشمهندس  الفنان يانجم يانجم

رد صلوحه ايوه ايوه

-قال له مش حضرتك طلبت اربعه شاي واتنين شيشه مشيت ليه

-قال صلوحه  لا كنت بجيب علبة سجاير  والفرقه بتجيب اكل عشان السكه طويله جدا

-قال بتاع البوفيه ياعم مش كنت تاخد ميكروباص احسن لك من غلب القطر ده

سمع الكلمتين وصلوحه إتجنن وراح لاسع  العواد قلم تراخ علي صرصور ودنه  وزعج سمعت  يالوح  يعني كده حنتبهدل

-رد العواد ياباشا مسعد بيصلح فرامل الميكروباص وحيرجعنا من سوهاج  ونوفر نص المصاريف

المهم طلع صلوحه المحفظة وأعطي بتاع البوفيه الفلوس وقال خلاص شكرا هات الباقي بس عاوز منك خدمه تساعدنا تطلع العده للقطر 

-قال طبعا حتدفع كام

-صلوحه صرخ ايه كله فلوس

-قال باشا اسمع كلامي  عشان توصل سليم بالعده

- قال صلوحه في نفسه عالم مستغله المهم دخل القطار للمحطه وتداخلت الاصوات  اي حاسب رجلي   الموبايل وقع مني  وعرفه الطبال بيزعق حاسب ياخينا  الطلبه تتكسر ووجد صلوه نفسه محشورا علي كرسي وفوقه العده والواد بتاع البوفيه بيحدف العده وصلوحه بيصرخ اه يايعيني اه الله يخرب بيتك  بس كفايه  تحرك القطار وقد تجمعت الفرقه بعد البهدله حول المطرب صلوحه الذي صار يمسح وشه من اثار المعركه وينظر في  كاميرا الموبايل بيقول اه  ايه الخربوش ده  بص كده ياعرفه دا الخربوش القديم وللا ده جرح جديد

- ردت الفرقه مع بعض بصوت جماعي جرح تاني   و صاروا يضحكون  بصوت جماعي

- قال صلوحه طيب ورحمه خالي حسن مخصوم من كل واحد خمسين جنيه عشان تضحكوا كويس

- رد عرفه ليه بس يانجم 

وفي تلك اللحظة حدثت مفاجأة غير متوقعه كلا البته – حلوه كلا البته دي -  أصوات قطط  محبوسه  تصدر من أسفل الكرسي الذي يجلس عليه صلوحه  وعلامات التعجب  ومصمصة  الشفايف شغاله قال صلوحه مين فيكم عمل اصوات القطط  أنا بخاف من القطط  وتحول صوت القطط إلي أصوات  متعدده – نيو نيو – اللي صوتها تخين واللي رفيع 

قال صلوح ياجدعان ايه احنا ركبنا عربية القطط  وقال الصوت جاي من تحت الكرسي ومد يده وإذا بعشرة قطط يقفذون علي صلوحه ومن معه وكل من عربية القطار يصرخون اي اي اه ايه ده قطط محبوسه في شوال تحت الكرسي ياولاد  الجزمه  وتجولت عربه القطار إلي حالة من الفوضي والستات تصوت والعيال تعيط

واحد قال فين الكمساري اللي في القطر الزفت ده  ايه راكبين قطر قطط وحيوانات . وبعد عدة دقائق كان الناظر والكمساري ومعهم مجموعة من مسئولين القطار وضابط شرطة   وخلال ثواني تم جمع القطط في قفص واعد الهدوء للركاب 

ثم قال الضابط مين صاحب القطط  ؟

قال صلوحه محدش يعرف سعادتك ياباشا أنا لقيت القطط تحت الكرسي ده

قال الكمساري يعني القطط جت لوحدها وحبست نفسها لوحدها  لازم نعمل لك محضر  وتترحل علي قسم شرطة سوهاج  ده غلط دا قطر للناس مش للحيوانات يابشر

رد عرفه العواد ياكمساري منعرفش القطط دي دت منين  وكل الركاب تشهد احنا  معانا عدة المزيكه 

قال الكمساري ايوه يبقي معاكم قطط ومزيكه ورايحين الصعيد تعملوا زار  لعيلة الفار  ههههههه

قال صلوح فار مين وتعلب ياعم الكمساري بقولك منعرفش حاجة عن القطط  بص شوف اتخربشت في وشي ازاي انا راجل فنان مطرب شعبي حاخد قطط الصعيد اهبب بيها ايه ياعالم ارحمونا 

قال الضابط لازم نعمل محضر بالحاله ونشوف لما تنزل في سوهاج

صرخ صلوح اه يا خرابي يابا

البقيه العدد القادم إن شاء الله