"البياضي" يرفض الموازنة ويشبه الحكومة بـ"العاطل" ويطالب بإقالتها

قال النائب فريدي البياضي عضو مجلس النواب عن الحزب المصري الديمقراطي الاجتماعي في الجلسة العامة لمجلس النواب إنه درس الموازنة في ساعات طويلة وقام بتحليل أرقامها، مضيفا أنه يفرض عليّا عقلي و ضميري أن أرفض هذه الموازنة جملة وتفصيلاً ويستحيل عليا ان أسرد أسباب رفضي.

أكمل النائب فريدي البياضي كلامه قائلاً فلتسمح لي أن أخلص الحكاية بطريقة بسيطة ، أنا أشبّه هذه الحكومة بشخص سكن في شارعنا سنة ٢٠١٨، لا يوجد لديه مصدر دخل فلجأ للاستدانة.

وقال النائب (السلف مش عيب) لكن بدل ما يعمل مشاريع ويشغّل مصانع، بيصرف على رفاهية وكماليات بدل ما يشجع الفلاح بيظلمه وبيشتري منه القمح بسعر بخس، بدل ما يشجع القطاع الخاص بينافسه منافسة غير عادلة ويموّته، وبالتالي علشان يسدد الدين الأول بيستلف من واحد تاني علشان يسدد للاول فيوصل إجمالي الدين من ٤،٥ تريليون لحوالي ٨ تريليون ! 

أكمل النائب فريدي البياضي، ياريت الأخ بيصرف الفلوس في تعليم أولاده، ولا في علاجهم! الانفاق المخصص للتعليم والتعليم العالي بدل من ٦٪؜ موضوع ٢٪؜!، الإنفاق على الصحة بدل ٣٪؜ مرصود ١،٤٪؜! و بعدين الأخ لما لقى الديون مش كفاية قرر ينزل الشارع يفرض جباية على الغلابة فتلاقيه مخصص للضرائب تريليون و٢٠٠ الف بزيادة ٢٦٪؜ علشان كدا أرفض الموازنة وأرفض استمرار هذه الحكومة وأطالب بإقالتها.